حضرت سید سالار مسعود غازیؒ- جنید احمد نور

14؍ رجب424ھ   یوم شہادت حضرت سید  سالار مسعود غازیؒ

                                                                                                                                                                                                                                                                                                                                                               جنید احمد نور، بہرائچ

مجاہد ِکبیر ،کاروانِ عشق و مستی کے امیر حضرت سید سالار مسعود غازی شہید  رحمہ اللہ کی  آخری آرامگاہ ہونے کا شرف شہربہرائچ  کو حاصل ہے۔ بقول انشاء اللہ خاں انشاءؔ     ؎

دلکی بہرائچ نہیں ہے ترک تازی کا مقام ہے یہاں پر حضرت مسعود غازی کا مقام

 

 

ماسٹر محمد نذیرخاں مرحوم لکھتے ہیں کہ’’شہید موصوف سلطان محمود غزنوی کے بھانجے،پیر ہرات حضرت شیخ عبداللہ انصاریؒ کے ہم عصر اور حضرت شیخ ابو الحسن خرقانی رحمۃ اللہ علیہ کے مسترشد تھے۔سرزمین ِبہرائچ کو یہ سعادت حاصل ہے کہ وہ شہدا ئے دینِ حق کے لہو سے بار بار لالہ زار بنی اور زہ سواران اسلام کے قدموں سے متعدد بار پامال بلکہ مالاما ل ہوئی ہے۔اس شہر کی فضاؤں کی رنگینی و رعنائی ،اس کا شباب اور اس کی شادابی انہیں مردان ِحق آگاہ کی مسیحا نفسی کی رہین ہے۔‘‘

لیکن کیا آپ جانتے ہیں کہ حضرت سالار مسعود غازی ؒ کی شہادت کس جنگ میں ہوئی ۔اکثر و بیشتر نہیں جانتے کہ بہرائچ کی کس جنگ میں آپ نے جام ِ شہادت نوش فرمایا ۔ آج ہم اسی پر روشنی ڈال رہے ہیں۔

حضرت سیدسالار مسعود غازیؒ کی ولادت 21؍ رجب المرجب 405 ھ کو اجمیر میں حضرت سید سالار ساہو ؒ کے یہاں ہوئی۔آپ کی والدہ سلطان محمود غزنویؒ کی  بہن  سترہ معلیٰ تھی۔ مصنف ’’آئینہ مسعودی ‘‘  نے  آپ کا نسب نامہ اس طرح لکھا ہے:’’سالارمسعود غازی  بن شاہ ساہو غازی بن شاہ عطا اللہ غازی بن شاہ طاہر غازی بن شاہ طیب غازی بن شاہ محمد غازی بن شاہ عمر غازی بن شاہ ملک آصف  غازی بن شاہ بطل غازی بن شاہ عبد المنان غازی بن شاہ محمد حنیفہ غازی  (محمد ابن حنفیہ)بن اسد اللہ الغالب علی ابن طالب کرم اللہ وجہہ ۔‘‘جب سپہ سالار مسعود غازی کی عمر قریب ساڑھے چار سال کے ہوئی تو سید ابراہیم  کی استادی میں ان کی تعلیم کی بسم اللہ ہوئی۔چونکہ ذہین  اور طباع  تھے،اس لئے دس سال کی عمر میں خاصی ترقی کر لی ۔آپ نے کم عمر میں ہی تمام علوم و فنون حاصل کر لیا ساتھ ہی گھوڑسواری اور تلوار بازی میں بھی ماہر ہوگئے تھے۔آپ کے والد اور استاد دونوں سلطان محمو د کی فوج میں سپہ سالار تھے ۔سالار مسعود غازیؒ   کا بہرائچ آنے کا مقصد جنگ نہیں بلکہ سیر وسیاحت تھی  اور آپ 14؍ شعبان 423ھ کو بہرائچ میں داخل ہوئے  ، بہرائچ کی آب و ہوا اور شکار کا عمدہ موقع آپ کو بہت پسند آیا اور آپ نے یہاں اقامت اختیار کی۔یہاں کے مقامی راجگان نے آپ کی اقامت کی مخالفت کی اور آپ سے جانے کو کہا لیکن آپ نے کہا کہ ہم یہاں کچھ دن گزار کر واپس چلے جائے گے لیکن وہ لوگ تیار نہ ہو ئے اور آمادہ جنگ ہوئے۔ یہاں کی غریب اور مظلوم عوام مقامی راجگان کے ظلم و ستم سے بہت پریشان تھی اور وہ آپ کا چرچا سن کر آپ کے پاس  مدد کے لئے پہونچی  جس پر آپ نے یہاں کے راجاؤں کے ساتھ  جنگ کرنے کا فیصلہ کیا یہاں پر فارسی کی ایک کہاوت مثل صادق آئی کہ ’’ تنگ آمد بجنگ آمد‘‘ اور  دریائے بھکلا کے کنارے بہرائچ کی پہلی جنگ ہوئی جو کئی روز تک چلی تھی  جس میں آپ نے فتح حاصل کی ، حیات  مسعودی  میں  عباس شیروانی لکھتے ہیں کہ دوسری جنگ بھی اسی دریا کے کنارے ہوئی تھی اور اس میں بھی آپ کی فوج کو فتح یابی حاصل ہوئی تھی۔اس کے بعد الغرض تیسری جنگ کی تیار ی ہونے لگی  جو فیصلہ کن جنگ ثابت ہوئی ۔ پہلی دو جنگیں شہر سے دور ہوئی تھی اور یہ آخری جنگ شہر کے قریب ہوئی  تھی ۔مقامی راجگان کی پیش قدمی کے بارے میں جب سالار مسعود غازیؒ کو معلوم ہوا تو آپ ؒ نے اپنی باقی ماندہ فوج کو جمع کرکےایک پُر جوش  خطبہ دیا  تھا  اور بعد خطبہ کے ایک دستہ کو بطور ہر اول کے مقرر کرکے حکم دیا کہ وہ بہرائچ سے دو کوس چل کر فوجی چوکی قائم کرے اور خود عبادت میں مشغول ہوئے۔ ۱۳؍ رجب ۴۲۴ھ کو صبح کے وقت مخالفین کا لشکر اس فوجی دستہ کے سر پر آ پہونچا اور لڑائی شروع ہوئی  اور سالار موصوف کو جنگ کی خبر بھیجی گئی تو وہ بھی اپنے ہمراہ فوج کو لیکر کنڈ پر ٹھرے۔اس کے بعد پوری فوجوں میں لڑائی شروع ہوئی اور دن بھر چلتی رہی اور دن ڈھلنے پر جنگ بند ہوئی اور دوسرے دن پھر صبح میں لڑائی شروع ہوئی۔مقامی راجگان کی فوج اس مرتبہ بہت زیادہ تھی دوپہر تک دو تہائی آپ کے ساتھی شہید  ہوگئے جن میں آپ کے چچا سالار سیف الدین (سرخرو سالارؒ) بھی شامل تھے ، آپ کی مزاردکھن جانب   درگاہ کراسنگ کے قریب واقع ہے۔آپ کے حکم سے تمام شہدا کو سورج کنڈ میں دفن کیا گیا کیونکہ مخالف فوجیں گھیرے ہوئی تھی اور سب کی نماز جنازہ سالار مسعود نے  پڑھائی تھی۔’’حیات مسعودی‘‘ میں ہے کہ  جب سہر دیو نے دیکھا کہ میدان جیت لیا ہے تھوڑ سےمسلمان باقی رہ گئے ہیں آؤ ان کا کام بھی تمام کریں تو چاروں طرف سے نرغہ کرکے تیر برسانے شروع کئے عصر کا وقت ہو گیا تھا  لڑائی جاری تھی  ایک تیر 14 رجب 424ھ  کو سپہ سالار مسعود غازی کے گلے میں لگا جس سے وہ کلمہ  پڑھتے ہوئے شہید ہوگئے ،سکندر دیوانہ جو ہر وقت سپہ سالار مسعود غازیؒ کے ساتھ رہتے تھے اور چند لوگ باقی تھے انہوں نے مہوئے کے درخت کے نیچے قبلہ رُخ کر کے لٹا دیا  جو چند رفقا باقی تھے وہ شام تک لڑتے رہے یہاں تک کہ ایک ایک کرکے شہید ہوگئے، اتنے میں رات ہو گئی اور لڑائی تھم گئی ۔رات کے اندھرے میں  باوجود تلاش کے مخالفین کو سالار مسعود ؒ کی لا ش نہ ملی رات بھر سالار مسعود غازیؒ کا وفادار کتا  بھی آپ کی لاش مبارک کے پاس رہا اور حفاظت کر تا رہا ۔مقامی فوج چھوت چھات کے خیا ل سے میدان جنگ سے چلی گئی۔ کچھ لوگوں نے واپس جاکر امیر سید ابراہیم کو آپ کی شہادت کی خبر دی۔ دوسرے دن صبح کو امیر سید ابراہیم میدا ن جنگ میں گئے ۔بحر ذخار  میں ہے کہ سید ابراہیم نے سالار شہدا ؒ کو درخت گل چکاں کے سائے میں دفن کیا اور سکندر دیوانہ کو حضرت کی قبر سے کچھ فاصلہ پر دفن کیا ،سکندر دیوانہ سے کچھ ہٹ کر اپنے لئے قبر تیار کی اور وہیں اسپ مادیہ خنگ(سفید گھوڑی)کو دفن کیا۔۔۔۔۔۔۔۔۔ ایک پہر دن گزرنے کے بعد میدان کارزار کی طرف روانہ ہوئے ،جب سہر دیو کو خبر ہوئی لشکر کے آنے کی واپس لوٹے ،سہر دیوسانپ کی طرح پیچ و تاب کھاتا ہوا تمام فوج کے ساتھ میدان جنگ میں آیا،حضرت سید ابراہیم نے گھوڑے کو ایڑ لگائی ،سہر دیو کے سر پر وار کیا اور اسے قتل کیا اور خود بھی اسی جنگ میں شہید ہوگئے،سید ابراہیم کے دوستوں نے ان کی لاش کو سکندر دیوانہ کے پاس اس قبر میں دفن کیا جسے انہوں نے خود تیار کیا تھا۔

خواجہ اکبر ؔ وارثی میرٹھی قطعہ تاریخ شہادت حضرت سالار مسعود غازی ؒ لکھتے ہیں :     

قطعہ تاریخ شہادت حضرت سید سالار مسعود غازیؒ

سالار غازی درچمن خلد  چوں رسید		غلمان و حور      راشدہ   امروز     روز عید
اکبرؔ بفکر بود کہ ہاتف زغیب گفت		تاریخ انتقال ، ولئی جہاں  شہید
		۴۲۴ ہجری

 

حضرت مسعودؒ غازی  کی شہادت کا کمال		جب ہوا مقبول حق آئی ندائے ذوالجلال
ہے یہ زندہ اس سے ہم راضی ہیں اکبرؔ وارثی		لکھ دو   ،         بَلْ أَحْيَاءٌ عِندَ رَبِّهِمْ   ،  رحلت کا سال
		۴۲۴ ہجری

 

حضرت سید سالار مسعود غازی ؒ  کی اس  تبلیغی کوشش نے ثابت کر  دیا کہ      ؎

بیک ساعت  بیک  لحظہ بیک دم دگرگوں مے شود احوال عالم

                                                آپ ؒ کے رفقاکی شہادت کی وجہ سے بہرائچ  شہر اور اطراف میں جگہ جگہ گنج شہداں کے آثار ملتے ہیں ۔  قطب بہرائچ حضرت سید افضل الدین ابو جعفر امیر ماہ بہرائچی ؒ کے بارے میں حضرت مولاناحکیم سید محمد فاروق نقشبندی مجددی مظہری نعیمیؒ لکھتے ہیں کہ’’ سید امیر ماہ بہرائچیؒ درگاہ شریف جاتے وقت اپنا پورا قدم زمین پر نہیں رکھتے تھے۔ انگونٹھوں کے بل چلتے تھے اور پھر بھی آپ کو افسوس تھا کہ اکثر شہدا ء  پر انگوٹھا پڑتا ہے۔‘‘اسی بات کو  معروف شاعر خواجہ اکبر ؔوارثی  میرٹھی (مصنف  میلاد اکبر اور آئینہ مسعودی ) رقم کرتے ہوئے کہتے ہیں    ؎

چپے چپے پر مزاراتِ شہیداں دیکھئے دید کے قابل ہیں بہرائچ کے میداں دیکھئے ہر طرف ہے بارش انوارِ عرفاں دیکھئے بارگاہ سید سالار ِ ذی شاں دیکھئے

حضرت سید اشرف جہا نگیر سمنانی اپنے ایک مکتوب 32 میں (جس میں سادات بہرائچ کا تذکرہ ہے) لکھتے ہیں ’’سادات خطۂ بہرائچ کا نسب بہت مشہور ہے ،سادات بہرائچ میں سید ابو جعفر امیر ماہ کو میں نے دیکھا ہے ،وادی تفاوت میں بے نظیر تھے، سید شہید مسعود غازی کے مزار کی حاضری کے موقع پر میں اور سید ابو جعفر امیر ماہ اور حضرت خضر علیہ السلام ساتھ ساتھ تھے ان کی مشیخت کے اکثر حالات کے لئے میں نے حضرت خضر علیہ السلام کی روح سے استفادہ کیا ہے،سید امیر ماہ کا مزار زیارت گاہ خلق ہے‘‘۔(مرأۃالاسرار،1993ء ص 926 ،میر سید امیر ماہ بہرائچی،  2015،ص 6)

سید ظفر احسن بہرائچی(سجادہ نشین  خانقاہ حضرت شاہ نعیم اللہ بہرائچی نقشبندی مجددی المعروف خانقاہ نعیمیہ، مولسری مسجد  بہرائچ)اپنے والد سید  شاہ اعجاز الحسن نقشبندی مجددی ؒ سے روایت کرتے ہیں کہ جب آ پ(سید سالار مسعودغازیؒ ) کی شہادت ہو گئی تو سب سے پہلے اس اہیر نے ہی آپ کا مزار دودھ  میں مٹی گوند کر بنایا تھا۔یہ روایت سینہ بہ سینہ چلی آ رہی ہے۔چوں کہ حضرت مولانا شاہ نعیم اللہ صاحب نقشبندی مجددی مظہریؒ بہرائچی کے اجداد اکرام حضرت سید سالار مسعود غازیؒ کے ہمراہ ہندوستان تشریف لائے تھے۔شاہ نعیم اللہ  بہرائچی ؒ نے اپنی خودنوشت سوانح حیات  میں لکھا ہے کہ  حضرت خواجہ عماد خلجی ۔۔۔۔ بہ نیت جہاد فی سبیل اللہ سلطان الشہدا حضرت سید سالار مسعود غازی ؒ کے ساتھ ہندوستان تشریف لائے اور قصبہ کنتور (ضلع بارہ بنکی) میں کفار کے ہاتھوں جام شہادت نوش فرمایا۔ (سلطان الشہدا ء  حضرت سید سالار مسعود غازیؒ،2011ء،صفحہ 43؍56)